Álvaro Villasante é un chef talentoso e comprometido coa gastronomía sostible e a promoción dos produtos da súa terra. Nacido en Palas de Rei, o seu enfoque innovador e a súa dedicación á calidade convertérono nun profesional destacado no mundo culinario. Actualmente, Álvaro é propietario do Restaurante Paprica en Lugo, onde elabora unha cociña saborosa, creativa, autodidacta e sen complexos. Nesta conversación fálanos dos seus inicios na gastronomía, dalgúns lugares e chefs que revolucionaron a súa forma de entender a cociña e do obxectivo principal do recoñecido Grupo Nove Cociñeiros do que forma parte. Como reflexión final, Álvaro achega a súa visión sobre a cultura de tapas gratis que afecta á gastronomía e á hostalería lucense.

Licenciada con grao en Xeografía e Historia e especializada en Historia da arte e Museoloxía, Aurelia Balseiro, directora actual do Museo Provincial de Lugo, dedicou a súa carreira ao mundo dos museos. Grazas ao seu traballo, entendemos mellor como evolucionou este importante museo, como leva a cabo a programación de actividades culturais e como logrou reunir a súa impresionante colección arqueolóxica. Balseiro fálanos ademais sobre o destacado movemento de arte urbana en Lugo e do importante labor do Museo na transmisión do coñecemento á sociedade.

Catedrático do IES Lucus Augusti, profesor da UNED e coordinador do Grupo Doxa, Juan Carlos Fernández Naveiro conversa sobre a necesidade de prestixiar a verdade en pos dun entendemento necesario nos tempos que vivimos.

A xuíza e profesora Sandra Piñeiro Vilas analiza os retos do feminismo na actualidade e destaca o papel fundamental do dereito na construción dunha sociedade máis xusta e equitativa.

José Manuel Rus é o xerente da Mostra Exposición de Muimenta (Moexmu) desde 1998. O labor de José Manuel Rus contribuíu significativamente ao desenvolvemento rural e foi fundamental no mantemento e crecemento da Moexmu, que se converteu nun referente para o sector gandeiro galego. A súa formación universitaria e o seu coñecemento do sector gandeiro proporciónanlle unha visión global sobre a situación actual e os desafíos futuros do sector. Baixo a súa xestión, a Moexmu recibiu recoñecementos importantes, como o Premio Aresa de Desenvolvemento Rural e o Premio Agader do Sector Agrogandeiro en 2024.

Ana Belén Traseira, enxeñeira química e directora da Universidade Nacional de Educación a Distancia en Lugo (UNED), recoñecida pola súa actividade académica e o seu activismo medioambiental fala neste pódcast dos retos das universidades na actualidade, dos logros dos proxectos do Centro Asociado da Uned en Lugo e da importancia da educación cun toque de lucensismo.

Adriano Alfonso, xuíz, profesor e doutor en dereito aborda no primeiro pódcast de LCD un tema crucial da nosa época, o fenómeno da desinformación.